Mga 1 percent pa lamang ang tigayon nga na clear gikan sa barado nga sapa sa banwa sang La Castellana.
Bukas sila sa ano man nga bulig para mapadasig ang clearing operation.
Suno kay John BF de Asis ang pamuno sang Disaster Risk Reduction Management Office sang La Castellana, malapit sa bridge naka tutok ang clearing sang mga heavy equipment nga ginpadala sa Ibid Creek, Sitio Tamburong sa Barangay Biaknabato.
Nagapasalamat sila sang bulig sang Negros Occidental Provincial Government nga nag padala sang back hoe kag sang mga dump trucks, kasubong man ang DPWH, pero masiyado kadako sang ulubrahon.
Paathag ni de Asis, ang nag nabaw nga creek ang may kasangkad nga 6 to 8 meters kag kadalumon nga 6 meters.
Ini ang tuyo nila nga mabalik.
Gikan sa taytay makita pa ang mga isa ka kilometro nga natabunan man sang mga sediment.
Mga 28,000 ka cubic meters ang estimate damlag pa suno kay Mt Kanlaon Natural Park Operations OIC – Supt, Philip Lechoncito ang kuluhaon nga sediment base sa MGB, LGU kag province nga assessment.
Gani base sa kadamuon sang ulubrahon, madugayan ang pag trabaho magluwas na lamang kun may mag dugang pa gid bulig suno kay de Asis.
Wala labot sini ang posibilidad sang pag tupa sang mabunok nga ulan isa man sa concern suno kay de Asis nga sarang nga mag anod pa gid sang dugang nga mga sediment.
“Overwhelmed gid katama, kay tungod sa iya kalapad and then sa amon LGU minimal gid ya nga operation mabulig. Pasalamat kami nga ara iya ka province nga nag deploy sila sang pila nila ka mga heavy equipment sa area, so amat-amat pero indi gid tanto nga dapat within one week. As per monitoring daw it will take months pa gani. Ang area nga iya sang province ara lang gid mismo sa may bridge, damo pa ya nga materials nga ara sa babaw especially sa may gin lapawan nga mga panimalay, damo gid to ya”, suno kay de Asis.
Sang Biyernes may 35 ka mga truck sang balas ang tigayon na hakot. Sa duta sang MKNP iga deposito ang materials nga nahakot.