Ultimate tambayan sa Bacolod ang Dunkin Donuts sa San Sebastian branch kay ini ang meeting place sang kadam-an sang wala pa sang cellphone. Ini man ang tambayan sang wala pa sa mall sa siudad.
Ini man ang palahuwayan sang mga naga night out antes magpauli sa ila nga balay. May mga naga paaga samtang wala pa sang jeep nga masakyan. Meeting place para sa mga group projects.
Para sa naka trabaho diri, nangin dako ini nga bulig sa ila pag eskwela.
Sa post sang Digicast Negros sang kahapon kun ano bala ang indi malipatan nga experience sa sini nga branch sang dunkin kadamo sang mga nag sabat.
Si Alexnder Tiu nag siling nga tungod sang dunkin naka graduate siya sa pag eskwela. Sabat sa iya ni Raymund Abosejo, indi niya ini malipatan kay ini man ang naka bulig sa iya pag eskwela.
Si Ariel Balmeo nag share nga empleyado man siya diri sang 1997, diri siya naga himo sang thesis sang 2000 kag diri ang ila kaladtuan pagkatapos mag disco sa Quorom.
Si Sharon Tirado ang isa naman sa mga pioneer nga cashier sang Dunkin San Seb.
May mga relasyon nga nagsugod diri, may mga heartaches man bangud sa sini nga lugar.
Si Bringuez Jillian Mae Diaz nag siling nga diri ang first meeting nila sang iya textmate.
Si Linrec John Sibonga Pamplona naman diri nkaita ang iya nga crush pero may ka holding hands nga iba.
Si Miamie Von Gimarangan nag share nga indi niya malipatan nga diri sila nagkitaay sang iya textmate nga iya nangin nobyo kag nangin bana pero sang parehos kuno sang Dunkin Donuts natapos man ang ila nga relasyon.
Para sa iban, ini na ang ila nga gin dak-an.
Si Maria Rowena pareja nag siling nga isa siya ka certified DDS, Dunkin Donut Supporter.
Si Michael Arboleras naman halin pa sang grade six sa Rizal Elementary School hasta nag high school diri na naga bakal sang donut.
Si Jafet Japoy Arevalo naman diri nag tinir samtang naga hulat sa resulta sang iya board exams sang 2017.
Si Fred Sales, naga bakal diri sang isa ka box nga donut kun payday.
Kag si Gil Castro nag share sang sini nga litrato. Since college days nila sa CSAB nangin part na sang kabuhi nila ang Dunkin San Seb. 25 years after graduation liwat sila nga nag balik diri kag nagpa picture.
Next year fifty years old na sila kag plano tani nila magbalik diri kag magpa picture galing wala na.
Wala man kuno sang forever, pero ang memories ang maga pabilin!