Inoras pa lang sang ginpost ang Citizen Kuryente Watch sa official Facebook page ni Mayor Albee Benitez naglab ot na sa masobra sa 150 ang nagpalab-ot sang ila nga reklamo sa alkalde.
Ang naga panguna nga reklamo nga nabaton sang talatapan sang alkalde amo ang, unscheduled brownouts, ang madako nga ginsaka sa bili sang kuryente kag patay andar nga power supply.
Si Erna Catatista, sang Regent Pearl Homes Subdivision sa Barangay Alijis nagalaum nga matagaan sang solusyon ang amo nga mga problema ilabi na nga halos kada semana may brownout sa ila.
Gani nagpamakal na siya sang rechargeable trouble lamp kag naghimu sang improvised lamp nga himu sa mantika nga may asin para lang may kasanag sa ila balay kada mag brownout.
Samtang, nagpalab ot man sang sulat kay Senador Raffy Tulfo ang katapo sang Power Watch Negros agud matigayon ang performance, technical kag financial audit sa Central Negros Electric Cooperative.
Ang senador ang nagpasalig man nga aksyunan ang reklamu sang mga kunsomedor.
Nagapati si Wennie Sancho, convenor sang consumer watch group nga sa bulig sang national government mausisa ang mga kontrata sang Ceneco upod sa mga power supplier nga amo ang ila ginapatihan kabangdanan sa pagsaka sang bili sang kuryente.
Ang grupo ang magahinyo man sang bulig sa alkalde kag kay Presidente Ferdinand Marcos,Jr.
Damlag pa sa hearing nga ginpatigayon sang Sangguniang Panlungsod sang Bacolod, isa isa nga gin sabat sang Ceneco ang mga palamangkutonan sang Power Watch kag sang mga konsehal. Halin sa mga kontrata, loans, pati na ang unscheduled brownouts kag indi ma contact nga hotline number.