Animal group, gin-rescue ang kuring gikan sa dalagita nga namahog nga lutuon ang sapat.
Sa isa ka video nga gin-upload sa social media nga karon deleted na, makit-an ang isa ka dalagita sa Barangay Tangub, siudad sang Bacolod nga may uyat nga sundang kag ginataya ini sa sapat, samtang nagasiling nga magaluto siya sang kuring.
Pagkatapos sini, iya ginhaboy sa ere ang kuring.
Ginpahayag sang Community Animal Rescue Efforts ukon CARE, Inc. nga ang ginhimo sang dalagita, makabig isa ka animal cruelty bangud sa idalum sang laye, iligal ang manakit sang kasapatan.
Kagab-i, gilayon nga na-rescue ang kuring apang may madamo ini nga pilas sa lawas kag dulunggan.. pati ang whiskers sini, may mga sunog.
Sini nga hapon, nagpangayo sang pasaylo ang dalagita sa nahimo sini sa kuring.
Suno sa iya, wala siya sang plano nga patyon ang kuring ugaling nadala lamang siya sang kainit matapos ini siya ang ginkagat sang sapat.
Gin-ako man sini nga nakibot siya nga may mga laye nga nagapangapin sa mga kasapatan kag nag-promisa nga indi niya na pagliwaton ang pagpanakit sa mga kasapatan.