Onse na ang kumpirmado nga kaso sang pertussis sa Bacolod City kag Negros Occidental. Isa sa nagpositibo sa Negros Occidental, isa ka bulan nga lapsag nga nagtaliwan sang nagligad nga semana.
Sa datus sang City Health Office, ang Bacolod City sa karon may yara sang anum ka kumpirmado nga kaso sang pertussis. Ang mga nagpositibo mga lapsag nga naga pang-edaron humalin isa ka bulan tubtob isa ka tuig suno sa CHO. Duha sa anum ang gikan sa Barangay Tangub, tig-isa gikan sa Granada, Handumanan, Taculing kag Villamonte. Nag saka naman sa lima ang kumpirmado nga kaso sang pertussis sa probinsya. Suno kay Dr Girlie Pinongan, ang Provincial Health Officer, ang lapsag nga ginreport napatay bangud sang pertussis ang napatay sa ospital kag nagtaliwan ini antes pa man nag-abot ang iya nga resulta. Ang apat ka iban pa nga nag positibo ang naka recover na. Humalin naman sa one month old tubtob 62 years old ang age group nga apektado sang pertussis kag probable pertussis cases sa probinsya. Ang Negros Occidental may 26 kag ang Bacolod naman may duha ka probable pertussis pending sang resulta gikan sa Research Institute for Tropical Medicine. May lima ka negative results sa Negros Occidental, lima man sa Bacolod.
Indi pa man makasiling kun may outbreak, suno kay Pinongan kay nagahulat man sila sang criteria sang Department of Health. May 10,000 ka vaccines nga pagabaklon ang probinsya para sa mga kabataan.
Padayon ang pahanumdom sa publiko nga maghalong. Likawan ang mga matawo nga lugar labi na para sa kabataan. Kun indi malikawan maayo kun naka face mask. Kun may ginabatyag labi na pag ubo mas maayo nga mag pa konsulta. Dapat man nga mag isolate para indi makalaton sa iban.