Ginaduso sang International Solid Waste Integrated Management Specialists, Incorporated ukon ISWIMS nga masugutran na ang pagpatuman sang Waste to Energy Project sa siudad sang Bacolod.
Ginsiling ni Mario Sandil, Operations Manager sang ISWIMS nga ila man ginabuligan ang siudad nga mapatuman ang WTE bangud daku ini nga bulig sa pag dispose sang mga basura nga yara sa sanitary landfill sa Barangay Felisa.
Suno sa iya, kun mapatuman ang WTE indi na mangin problema ang pag dispose sang mga basura bangud planta na ang maga-ubra sini kag indi na ini magtinir pa sa sanitary landfill.
Kun mapatuman, suno sa iya, ini ang mangin pinakauna nga WTE sa bug-os nga Visayas.
Samtang, yara na sa 75 porsyento ang natapos sa pag construct sang cell number 5 sa amo nga landfill.
Ginsiling ni Sandil, nga ginapaabot nga mangin fully operational na ang cell number sa ika-duha nga semana sang Hunyo sini nga tuig.
Ang amo nga cell ang may kalaparon sang duha ma hektarya kag sarang nga mabutangan sang 2,500 tubtob 5,000 tons sang basura adlaw-adlaw.
Ginatan-aw man sang ISWIMS nga maglab-ot sa duha tubtob tatlo ka tuig ang life span sang cell number 5.
Kon tigayon na nga mangin operational ang cell number 5, untaton na sang ISWIMS ang pagbutang sang basura sa cell number 4.*
[sibwp_form id=1]