Wala unod ang vault sang treasurer’s office sang Sagay City sang ginbuksan ini sang Biyernes nga adlaw.
Suno kay City Administrator Atty Ryan Bonghanoy, ginmando ni Sagay Mayor Narciso Narwin Javelosa, Jr., ang pagbukas sang vault.
Ini ang ginsaksihan mismo sang alkalde, City Legal Officer sang Sagay, mismo ang city treasurer nga si Juvy Pinongan, kag tiglawas sang Commission on Audit.
Suno kay Bonghanoy, antes pa man ginbuksan ang vault ginhatagan na si Pinongan sang 30 diyas sang COA para mag liquidate sang 22 milyones pesos nga Health Emergency Allowance kun sa diin nalakip na diri ang 7.3 million pesos nga gina reklamo wala ma release sa mga frontliners.
Ginreklamo si Pinongan sang mga duktor kag nurse angut diri rason nga nagpatigayon sang pag pangusisa.
Natungod nga ang treasurer sa idalom sang Bureau of Local Government Finance yara na sa natungdan nga ahensya ang pag pangusisa bahin sa kaso administratibo kag yara na sa COA ang criminal nga aspeto kun mapaslawan si Pinongan sa pag liquidate sang bilog nga 22 milyones pesos.