Sangguniang Panlungsod sang Kabankalan ang nag pa gwa sang resolution nga naga pautwas sang ila nga pagka dismaya sa pag hire sang bag-o nga alkalde sang mga taga indi Kabankalan para sa nagkalain lain nga mga position sa siudad.
Sa July 18 nga session sang Kabankalan SP gin pasar nila ang resolution 2022-282 nga suno kay Vice Mayor Miguel Zayco pag pautwas sang ila nga sentimiento.
Maayo suno sa iya ang lihok ni Mayor Benjie Miranda nga wala niya gin pangkakas ang mga job order workers sang nagligad nga administrasyon.
Pero kay madamo man suno sa iya sang mga naga pangita sang trabaho nga gikan mismo sa siudad sang Kabankalan, kuntani mas maayo kun ang mga gin-hire sang bag-o nga administrasyon gikan man sa siudad kag indi ang mga anay empleyado man sang iban nga local government unit.
Sa ila nga impormasyon suno kay Zayco may 23 ka mga non-Kabankalanon nga ginhire. Mga anum suno sa iya ang yara sa Bids and Awards Committee, ang iban yara sa General Services Office kag Agriculture Office.
Sa Facebook live sa page ni Mayor Miranda iya gin pahayag nga mas madamo pa kuntani sang mas maayo nga resolution nga mapasar sang SP tigaylo sang resolution 2022-282.
Ehemplo diri suno sa alkalde ang pag pasar sang resolution nga masabat ang problema sa dengue, amo man sa Covid, bisan pa gani ang problema sa baha kag ang malubog nga tubig.
Gindugang pa ni Miranda nga daw kasubong nga siya ang gina bully.
“Tagaan increase, resolution nga tanan nga dugay na, 20 anyos or ano. So guys, kun amo na klase, daw gina bully ako eh. Pero sa gihapon ang Ginoo indi mag pabaya sa akon”, suno kay Mayor Miranda.
“Kami sa council we don’t respond to that. As we all know ang resolution is an expression of sentiment. The councilors – wala to ya any bahid of pulitika. Gusto lang gid ya sang councilors ipahiwatig nga ang preference sang council is ang mga (taga) Kabankalan kun may bakante, nga unahon kuntani ang kabankalanon kun kaya nila o indi”, suno kay Vice Mayor Zayco.