Gina-usisa na sang kapulisan kag sang Department of the Interior and Local Government ang gina-alegar koneksyon ni Atong Ang kay Police Major Edgar Tonico Jr.,ang anay pamuno sang CIDG Bacolod nga ginkakas sa pwesto kag ginatudlo protector sang iligal nga online sabong sa Barangay Concepcion sa siudad sang Talisay.
Ginsiling ni DILG Secretary Jonvic Remulla, nga matapos nga gin-raid sang kapulisan ang isa ka factory sang mga peke nga sigarilyo sa Barangay Calumangan sa Bago City, gintugda sang mga nagkaladakpan nga Chinese nationals ang pangalan sang pulis nga protektor nila.
Natukiban sang kapulisan nga tuig 2020 pa lang, nakaupdanay na ang pulis kag si Ang sa pag operate sang mga iligal nga e-sabong sa pungsod.
Gina-alegar man nga ang nagapadalagan sang factory sang peke nga sigarilyo kag sang e-sabong sa Negros Occidental ang isa lamang ka grupo.
Ginhingadlan ni Remulla ang duha ka persona nga yara sa likod sang operasyon. Ini si alyas “Don Robert” kag alyas “MakMak”.
Base sa imbestigasyon, gina-alegar nga ang pulis kag ang mga nagapadalagan sang amo nga mga iligal nga aktibidad sa probinsya ang mga tinawo ni Ang.
Indi pa matumod sang PNP kun si Ang gid man ang yara sa likod sang amo nga mga operasyon sa probinsya bangud nagapadayon pa ang ila pagpang-usisa sa amo nga kaso.
Ang pulis nga protektor ang yara na sa karon sa preventive custody sang Police Regional Office Negros Island Region.*
[sibwp_form id=1]