Gintugyan na sa iban nga mga konsehal ang mga komitiba nga naka assign kay Bacolod City Councilor Al Victor Espino matapos ini ma-suspend sang anum ka bulan sang Office of the Ombudsman.
Suno kay Vice Mayor Claudio Jesus Puentevella, bisan wala pa sila sang opisyal nga dokumento, may verbal instruction na ang DILG-Bacolod sa suspension order nga may kaangtanan sa reklamo sang anay BTAO Head nga si Police Major Junji Liba batuk kay Espino.
October 2023 sang ginreklamo si Espino ni Liba sang pagpamahog.
Suno kay Mayor Greg Gasataya, kinahanglan nga respetuhon ang desisyon sang Office of the Ombudsman kag sundon ang proseso sang layi.
Ginkumpirma naman ni Espino sa Digicast Negros nga nag-file na siya sang Motion for Reconsideration.
Agud mapadayon ang operasyon sang konseho, gin-designate si Councilor Jude Thaddeus Sayson bilang Majority Floor Leader, si Councilor Caesar Distrito bilang Chairman sang Committee on Laws kag Committee on Urban Poor kag si Councilor Homer Bais bilang Chair sang Committee on Education.
Ginpahayag man ni Puentevella nga wala na nakatambong si Espino sa regular session sang Miyerkules.