Nagpadulong sa merkado agud nga mangumpra ang 56-anyos nga tag-iya sang balay sa isa ka subdivision sa Barangay Gargato sa Hinigaran.
Nakibot siya sang ma-abtan niya ang isa ka gin-alegar kawatan, nga bag-o lang naghalin sa iya balay, bitbit ang pila ka mga pagkabutang.
Sa imbestigasyon sang PNP, ginsaka sang suspek ang kudal sa likod sang balay kag ginkakas ang portion sang temporary nga dingding nga himo sa plywood malapit sa hagdanan agud nga makasulod.
Sa bulig sang mga tupad-balay kag security guard sang subdivision, nadakpan ang suspek kag ginturn-over siya sa nagresponde nga patrol team sang Hinigaran Police Station.
Kapin sa P15,000 nga balor sang pagkabutang ang nakawat sang suspek. Lakip na diri ang helmet, sapatos kag mga plates sang dumb bell.
Samtang ginarikisa sang kapulisan ang suspek bilang standard operating procedure, nakuha sa bulsa sang iya shorts, ang isa ka pakete sang ginasuspetsuhan shabu.
Ang 26-anyos nga suspek detained karon sa custodial facility sang Hinigaran PNP.*