Councilor Jude Thaddeus Sayson handa nga pagtigayon sang imbestigasyon angut sa reklamo sang mga mangunguma kag mananagat sa Bacolod nga wala makabaton sang ayuda halin sa Presidential Assistance to Fisherfolks and Farmers ukon PAFF.
Nakahanda si Councilor Sayson nga iduso ang pagpang-usisa sa konseho kun may yara sang katapo sang farmer kag fisherfolk organization nga handa manindugan agud ireklamo ang tagtaganay sang ayuda halin sa PAFF.
Nagapati si Sayson nga amo ang pamuno sang Committee on Agriculture sang konseho nga dapat ma review kag ma-validate ang listahan sang mga farmer kag fisherfolk agud mapat-ud ang mga lehitimo nga benepisyaryo sang PAFF.
Damlag pa may ginatos ka mga mangunguma kag mananagat nga nagreklamo matapos wala sila makabaton sang tig P10,000 nga ayuda sang ginpangunahan ni Presidente Ferdinand Marcos Jr. ang pagpanagtag sini sa Bacolod kag Negros Occidental.
Ginsiling ni City Agriculturist Maricar Quiro nga kalabanan sa kapin 600 ka mga tag-reklamo ang na-disqualify bangud iban sa ila nagabaton na sang ayuda halin sa national government kag katapo sang 4Ps.
Dugang niya nga mismo mga farmer kag fisherfolk organization ang nag-submit sang validated list sang mga benepisyaryo sang PAFF.