33 ka mga katapo sang KAFAWA ukon Kapatiran Farm Workers Association ang magalunsar sini nga semana sang ila Negosyo nga maga serbe ila nga palangabuhian.
Sa pondo nga gikan sa Department of Social Welfare and Development kag Office of the Presidential Adviser on Peace, Reconciliation and Unity, gintipon nila ang ila nga livelihood reinforcement fund nga tig 25 mil pesos para itukod ang Sabor Layaw.
Suno kay Ricky Guzon ang project manager, gina tanyag nila ang bisaya nga lechon manok sa ila nga stall sa Purok Pine Tree sa Barangay Bata sa Bacolod kag ini ang maga bukas sa Setyembre 8. Mismo ang director sang OPAPP nga si Susan Marcaida ang dinapit nga bisita.
Wala labot nga mas saboroso gid man ang bisaya nga manok mas health ini suno sa iya bangud nga organically grown. Mas barato ang ila nga presyo nga sarang mabakal sa 395 pesos ang regular kag 430 pesos naman ang jumbo.
Sila man mismo ang naga sagod sini paagi man sa bulig sang gobyerno probinsyal. Nagahaylo man sila sa iban nga mga nagasagod sang free range chicken nga mangin supplier nila.
Ang ila nga mga katapo ang gikan sa La Castellana, Binalbagan, Moises Padilla, himamaylan City kag Isabela.
Mga anay katapo sila sang Revolutionary Proletarian Army – Alex Boncayao Brigade kag sa ila nga pagbalik sa sabak sang gobyerno pila sa ila nga nabaton amo ang housing assistance kasubong man livelihood assistance.