Kaso sang gina-alegar abduction ang gina-validate sang pamunuan sang Bacolod City Police Office.
Agosto 20 sang gab-i sang gin-alegar gin-abduct sang wala makilal-an nga mga persona nga sakay sa van ang isa ka 21 anyos nga kolehiyala sa atubang sang patyo sa Dalan Burgos sa Bacolod.
Pero gina-validate pa sang pamunuan sang Bacolod City Police Office ang insidente bangud wala nagasanto ang iya sini mga pahayag matapos makapalagyo.
Suno kay BCPO director Police Colonel Joeresty Coronica, wala sang CCTV footage sa lugar nga nakakuha sang gin-alegar abduction.
Ang biktima nga taga-Binalbagan ang nagsaysay sa kapulisan nga nakaluwas siya paagi paglumpat sa van samtang nagabyahe sa Bago City.
May mga higot pa ang iya liog kag kamot sang na rescue siya sang mga manug damang sa area sang Barangay Sampinit sang amo man nga gab-i.
Antes pa man natabo ang gina-alegar abduction may pila na ka nagalapta nga fake news sa social media angut sa ginasiling kidnapping kag abduction nga ginapatihan sang kapulisan nga panglabugay lamang.
Si Mayor Albee Benitez ang nagmando na sang City Legal Office nga pasakaan sang kaso ang mga nagpalapta sang mga patalang nga mga istorya sa social media.