Kaso nga murder batuk sa 14 ka mga persona nga naga lakip sang opisyales sang Moises Padilla kag anay opisyales sang banwa ang gin-dismiss.
Gina pasalamatan kag ginakalipay ni Moises Padilla Vice Mayor Adrian Villaflor ang pag-dismiss sang korte sang kaso nga murder batuk sa iya kag sa 13 ka iban pa.
Sa desisyon nga ginpapanaog ni Guihulngan Regional Trial Court Acting Presiding Judge Ma. Anna Priscilla Pareja, gin dismiss ang kaso nga murder may kaangtanan sa kamatayon ni Moises Padilla councilor Jolomar Hilario bangud sang lack of interest sang tagreklamo sa pag padayon sang kaso. Si Hilario ang ginpatay sang mga armado sa iya nga balay sa Inolingan sa Moises Padilla sadtong March 2019.
Ang Leonardo Panaligan Command sang rebeldeng New People’s Army ang nag ako sang responsibilidad sa pag patay kay Hilario. Ila ginsiling nga si Hilario ang assest sang militar. Sa order ni Judge Pareja iya ginsiling nga may kaangtanan sa Constitutional guarantee sang kinamatarung sang akusado para sa isa ka speedy trial kag malikawan pa gid ang delay sa pag hatag sang hustisya, ang motion to dismiss sang defense ang gin grant. Nakasaad man nga ang defense ang makapila na nag move sa dismissal sang kaso bangud sang kakulang sang interes sa bahin sang complainant nga mismo ang anak sang biktima nga si Leo Francis Hilario kasubong man sang mga private prosecutor.
Nalakip sa ginmando nga dismissal sang murder case ang na file batuk sanday anay Isabela Mayor Joselito Malabor, Moises Padilla Councilor Vincent Bryan Garcia, anay konsehal Jimmie Don Plaza kag Morito Flores, anay Brgy Capt Jonathan Villaflor kag Feliza Villaflor suno kay Atty Jose Max Ortiz. Dugang pa niya nalakip man sa na dismiss nga kaso sanday Roel Sarillo, Jason Abria, Raymond Gabitanan, Richard Sarillo, Armando Cordero, Amy Locsin kag Joemer Pablo.
“Pasalamat kita sa Ginoo kag lipay gid kami nga na dissmiss na na nga kaso. Napamatud-an nga inosente kami sa natabo. Una ang sa akon gin file five counts of murder ang isa nagsaka amo na ang kay formber SB Jolomar Hilario. Lawig naman ang hearing, pasalamat kami sa amon abogado kay siya gid ni ga follow-up, daw wala naman gid interest ang complainant. Daw tatlo na ka hearing ang balik-balik namon. Amo na pasalamat kami gin dismiss ni judge ang amon kaso”, suno kay Villaflor.