Lima ka kilo sang karne sang baboy gikan sa isla sang Panay ang na-intercept sang mga opisyal sang Barangay Tuburan sa banwa sang EB Magalona kaupod ang personnel sang Municipal Agriculturist’s Office kag Provincial Veterinary Office (PVO).
Ang karne sang baboy ang na-intercept sa isa ka haya sa Sitio Panaosawon sa Barangay Tuburan mga la una sang hapon sang Martes.
Sa post sang page sang banwa, ginsunog ang amo nga karne nga nag gikan sa Barangay Daan Banwa, sa Tapaz, Capiz.
Ang karne ang ginbitbit sang isa ka babaye nga nagbisita sa iya mga himata. Nahibaluan ni
Punong Barangay Ramonito Espacio Jr. nga ang karne ang gikan sa Panay sang siya ang mag bisita man sa haya para kuntani mag hatag sang ila nga funeral assistance kag gintanyagan sila nga sugbahan sang baboy sang pamilya.
Sa datus sang PVO, humalin Oktubre 15 tubtob 22, nagdangat na sa 214,000 pesos ang balor sang gin-confiscate kag gin ship back nila nga mga pork products.
Suno kay Negros Occidental Governor Eugenio Jose Lacson, sa pagsapol sang Department of Agriculture sa presidente sang Domingo kun sa diin gintalakay ang sitwasyon sang rehiyon bahin sa African Swine Fever, ginsiling ni Presidente Ferdinand Marcos, Jr nga may kinamatarong ang tagsa ka LGU sa pag control sang mga naga sulod sa puerto sini.
Ginpatuman sang probinsya ang banning sa mga baboy kag pork products gikan sa Panay kag Guimaras sini lamang kasunod sang gin report ASF cases sa Oton sa Iloilo. Dugang pa ni Lacson ang amo nga tikang sang Negros Occidental ang gin-sustain man sang DILG.