OFW help desk sa probinsya ang bukas sa mga himata sang OFW ukon mismo sa natungdan nga OFW nga naga kinahanglan sang bulig sa tunga sang gamo sa karon sang Israel kag pungsod Iran.
Ginsiling ni Governor Eugenio Jose Lacson, nga automatic nga bukas ukon sarang makadtuan ang Migrant Resource Center sa idalom sang Public Employment Service Office sa probinsya sang himata sang Negrense OFW nga naga kinahanglan sang bulig.
Ginsiling ni Karen Dinsay ang PESO Manager sang probinsya nga ang mga OFW sa Israel, sa Iran kag bisan pa gani sa kaiping nga pungsod sang Jordan nga distressed ukon displaced bangud sang gamo sa karon pwede maka pakig-angut sa ila nga talatapan.
May hotline nga pwede matawgan (034) 476 7230 kag 0998-9569037. May 5,000 pesos nga provincial funds ang pwede nga mahatag bilang assistance.
Klaro ni Dinsay ila gina hulat ang Department of Migrant Workers nga mag advise kun may repatriated Negrense OFWs. Sa karon wala pa man.
Ginsiling man ni Overseas Workers Welfare Administration Region 6 Director, Rizza Moldes nga wala pa sang OFW ukon himata nila nga naka pangayo man bulig sa ila talatapan.
Ginsiling ni DMW Secretary Hans Leo Cacdac nga may 109 ka nga OFW sa Israel nga luyag mag repatriate. 85 sa ila ang yara na sa ila nga intial list kag 24 ka iban pag ang nag signify na sang ila nga tinutuyo.
Humalin pa sang Biyernes gin atake sang Israel ang major nuclear kag military sites sang Iran, kun sa diin nagkalamatay ang mga leading commander kag nuclear scientists sini.
Ang Iran naman nag responde batuk sa Israel.
Nagalaum ang gobernador nga ang mga world leaders maga bulig agudto mag angkon man sang kalinong ang amo nga rehiyon.