Kapin sa P361,000 nga balor sang magic mushroom ukon uhon nga ginahimo nga alternatibo nga iligal nga droga ang nakuha sa buy-bust operation sang kapulisan.
Suno sa PNP gikan sa Don Salvador Benedicto ang amo nga mushrooms.
17 tanan ka mga pack sang magic mushroom nga may market value nga P361,000 ang nakumpiskar sang katapo sang Police Station 5 paagi sa buy-bust operation nga ginpatigayon batuk sa duha ka mga street level individual sa Barangay Cabug sa Bacolod.
Na recover man sang mga pulis ang 10 ka mga sachet sang suspected shabu sa mga suspek.
Suno kay Police Lieutenant Bonifacio Ancajas, spokesperson sang Bacolod City Police Office, makabig nga alternatibo sa marijuana kag ecstasy ang magic mushroom nga isa ka sahi sang hallucinogenic drug.
Sa initial nga pagpang-usisa sang kapulisan gikan sa banwa sang Don Salvador Benedicto ang wild nga klase sang mushroom nga gina proseso sang mga nadakpan antes ini ibaligya.
Ang magic mushroom sarang masamo sa pagkaon nga daw regular nga subak nga ginabaligya sa merkado.
Gani nag coordinate na ang BCPO sa Negros Occidental Police Provincial Office kag sa Food and Drug Administration agud mapunggan ang paglapta sang magic mushroom.
Ginpasaka naman ang kaso angut sa pagsupak sang Republic Act 9711 ukon ang Food and Drug Administration Act kag Republic Act 9165 batuk sa mga suspek.