Kapin 60 ka mga palero sang IPM naghalin sa trabaho, penalty ipatuman sang Bacolod LGU tuga sang backlog sa hakutay sang basura.
Sa ginpadala nga sulat sang IPM-CDC, ila ginpaathag kay Mayor Albee Benitez kun ngaa may yara backlog sang basura sa bulan sang Mayo.
Ginsiling ni BENRO head Ma. Fe Trespuentes nga mahimo ang gulpi nga pagbiya sa trabaho sang kapin 60 ka mga palero humalin sang Mayo 6 ang kabangdanan kun ngaa naga-lab-ot sa 40 tubtob 60 ka tonelada sang basura ang indi mahakot sang IPM kada adlaw.
Ginpahayag ni City Legal Officer Karol Joseph Chiu nga magapatuman sang penalidad ang siudad batuk sa IPM.
Gindugang ni Chiu nga tungod sang kakulangan sang IPM masami madata ang kaso sang illegal dumping kasubong na lamang sang nag-trending nga video sang lalaki nga naghaboy sang basura sa atubang sang patyo sa dalan Burgos sa Barangay Villamonte.
Samtang, base sa monitoring sang BENRO, ginsiling ni Trespuentes nga sang sini lang nga Domingo na-amat amat nga nagbalik sa normal ang hakutay sang basura sang maka-hire na sang dugang nga personnel ang private garbage collector sang siudad.