Kapihan gin ransack sa Barangay Tangub, kwarta, laptop kag pati hinuptanan nga shih tzu ginkawat.
Indi lang ang gin-loan nga kwarta sang tag-iya ang ginkuha sang mga kawatan nga nang-ransack sang Bunny Café sa Araneta street sa Barangay Tangub sang Domingo sang kaagahon.
Naglain ang buot ni Mikel Oligo kay pati ang iya hinuptanan nga shih tzu nga si Akira ang gindala man sang nakapalagyo nga kawatan.
Istorya ni Oligo, nagtake-out lang siya sang pagkaon sa fastfood chain sang makit-an nga bukas na ang pwerta sang kapehan kag ginguba ang padlock.
Nadula ang iya masobra P2,000 nga benta, pati na ang malapit P35,000 nga ginhulam para kuntani gamiton sa iya bag-o nga salayluhan sang negosyo.
Panawagan ni Oligo nga kuntani mabalik lang ang iya hinuptanan nga iya na ginakabig parte na sang ila pamilya sa kapehan.
Samtang, gin-usisa na sang katapo sang Police Station 8 ang kopya sang CCTV sa commercial establishment agud makilal-an ang mga responsable sa pagpangawat.