Libre nga screening para sa mga indigent nga kababainhan nga naga pang edaron 30 to 65 years old ang pwede ma avail sa Corazon Locsin Montelibano Memorial Regional Hospital bilang kabahin sang kampanya kontra cervical cancer.
Sa Bacolod City sang 2023, may 12 nga napatay bangud sang cervical cancer. Nagapati si Dr Joy Vallega, Medical Specialist sa CLMMRH nga mahimo indi updated ang datus kag madamo ang apektado sini. Subong nga 2024 suno sa iya, sa CLMMRH, halos kada semana may isa nga nagaka admit bangud sang bleeding tuga sang cervical cancer. Sa datus sang World Health Organization ang cervical cancer ang ika apat sa most common cancer sa mga kababainhan. Sa Pilipinas, ika duha ini sa leading cancer sa mga babaye. Tuga ini sang Human Papillomavirus nga ma transmit paagi sa pag pakighilawas. Wala ini sang sintoma kag sa masami ma detect na lamang kun yara na sa advanced stage. Rason nga ginahaylo ang mga kababainhan nga mag pa screen ayhan paagi sa pap smear ukon visual inspection gamit ang acetic acid ukon HPV DNA. Sa ini nga pamaagi malikawan ang cervical cancer ukon mas temprano nga ma detect.
“Pwede gid ni siya ma-avail sang aton mga indigent patients for free. Wala sila sang kinahanglan nga ipa gwa nga kwarta. So this is part of our contribution to decrease ang load sang cervical cancer sa aton country”, suno kay Vallega.
Bilog nga tuig available ang amo nga screening mas ginpabaskog lang ang kampanya sa masunod nga tatlo ka bulan.
“There’s a lot that we can do to stop Filipinas from dying from cervical cancer. I hope we don’t keep this information that we gain today to ourselves. We need to share to everyone we know. Diri guro helpful ang pagiging marites. I marites ta sa tanan kun ano ang nabatian ta today. That it is preventable, there’s a screening test and there’s even a vaccine”, suno kay Vallega.
Suno kay Dr Aimee Marie Gayomali Medical Officer, IV sang DOH Western Visayas, sa Negros Occidental target nga ma screen ang indi magnubo sa 23,457 ka mga kababainhan kag 5,965 naman sa Bacolod. Pwede man maka pa test sa mga Rural Health Centers gamit ang PhilHealth ukon sa mga ospital nga may nagakaigo nga fees.
Suno kay Dr Claire Capiral ang Cancer Program Coordinator sang Bacolod City Health Office may regular man nga screening kada Biyernes sa Lying-in Clinic sa CHO.
“This is a good venue to make the general public of Bacolod aware that we have screening services available and you can avail of that”, suno kay Capiral.