Ginsiling ni Retired Police Colonel Levy Pangue, pamuno sang City Legal Office Enforcement Team nga obligado ang mga punong barangay nga sawayon ang mga nagapatukod sang illegal structures sa ila lugar.
Ini bangud sandig sa direktiba sang Department of Interior and Local Government, mga punong barangay mismo ang may responsibilidad nga ipabilin nga hilway sa kun ano man nga sablag ang ila mga dalanon para sa publiko.
Ginapangabay man ni Bacolod City Mayor Greg Gasataya ang mga punong barangay nga mag kooperar sa CLO. Ang indi magsunod suno sa iya, pagapasakaan sang siudad sang kaso administratibo.
Dugang ni Pangue, sumugod subong nga adlaw tubtob sa Biyernes, balikan sang CLO ang tanan nga mga area nga na clear na gikan sa mga illegal structures.
Lakip diri ang Barangay 35, 2, 12, kag 16. Amo man ang North kag South Capitol Roads nga makapito na ka beses nga ginpahalin, apang nagabinalik sa gihapon.
Suno kay Pangue, indi masarangan sang siudad nga ipabilin ng matawhay sa publiko ang mga sidewalks kon wala man sang aksyon gikan sa mga punong barangay.
Ginahaylo sang CLO ang siudad nga tiponon ang mga punong barangay agud mapaintsindi sa ila ang ila nga responsibilidad sa amo nga mando sang DILG.*
[sibwp_form id=1]