Nagsaka sa 761.2 million pesos ang kahalitan sang El Nino phenomenon sa pananom sa Western Visayas.
Suno kay Office of the Civil Defense Regional Director Raul Fernandez nagsapol sila kahapon kag as of March 12 nga datus, may 20,488 ka mga mangunguma ang gin-report apektado. 15,417 naman ka ektariya sang mga pananom ang apektado sang tuman nga kainiton.
Ang probinsya sang Iloilo ang may pinaka daku nga gin-report kahalitan – 519.1 million pesos. Naga sunod ang Antique nga may 130.7 million pesos. Ikatlo ang Negros Occidental – 78.4 million pesos.
Nagasunod ang Aklan nga may 30.1 million pesos kag 2.7 million naman sa Capiz. Sa bilog nga rehiyon suno kay Fernandez ang siudad lamang sang Himamaylan ang nag-report sang water shortage sa walo ka mga barangay sini. Ang water level sa mga dam sa probinsya ang indi pa apektado suno kay Fernandez, pero ang sa Iloilo suno sa iya ang yara na sa critical level.
“Yung sa Negros, okay pa naman po yung water level sa Negros. Yung sa Iloilo medyo bumaba na siya, nasa baba na siya ng critical water level”, suno kay Fernandez.
Antes pa man maka deklara sang state of calamity may pila ka mga criteria. Nalakip diri – at least 15 percent sang population suno sa iya ang apektado ukon kinahanglan sang emergency assistance, 30 percent naman sa palangitan-an nila ang apektado.