Gintiro sang isa ka lalaki ang isa ka kagawad sang Barangay Santa Rosa sa banwa sang Murcia pasado las 10 kaina sang aga.
Dead on arrival sa ospital si alyas “Joe”, 59-anyos, isa ka kagawad, residente sang Purok Relocation sa Brgy. Sta. Rosa.
Ginsiling ni Police Capt. Honey Labaro, hepe sang Murcia PNP, gikan sa clean-up drive sa proper sang barangay ang biktima. Nagsakay siya sa motor sang isa niya ka kaupod nga kagawad.
Apang paglab-ot sa Purok Puncian, nanaug sa motor ang biktima kag may nagpalapit sa iya nga lalaki kag siya ang gintiro sa ulo.
Nalagyo ang gunman sakay sang motorsiklo nga ginamaneho sang wala pa makilal-an nga persona.
Padayon karon ang imbestigasyon sang kapulisan agud mahibaluan ang motibo sa insidente.*