Matapos nga gin-aksyonan sang siudad ang ginreklamo sang mga residente sang Barangay Felisa nga nagausbong nga baho gikan Sanitary Landfill sang Bacolod City, ginsiling ni Barangay Felisa Kagawad Melonie Beñas nga wala na sila gakasinghotan nga baho malapit sa landfill.
Dugang niya, halos wala naman sang baho ang mga dump truck sang garbage collector kun maglabay sa ila nga dalan kag wala naman sila sang tagas nga nakita gikan sa landfill padulong sa malapit nga sapa.
Ginsiling ni Beñas, nga matapos ang public hearing nga ginpatigayon sang Environmental Management Bureau Negros Island Region, nabatyagan na sang mga taga Barangay Felisa nga may development na ang pagdumala sang Sanitary Landfill.
Padayon man nga ginatun-an sang siudad ang posible nga nga pag-reroute sang mga garbage truck sang ISWIMS agud indi na ini maglabay sa mga mayor nga dalan sang Barangay.
Apisar sini, padayon nga ginapangabay sang Barangay ang siudad nga ulikdan sila kag ila mga residente agud indi man sila matam-an sa pagsalo sang mga basura gikan sa bug-os nga Bacolod.
Panawagan naman sang Barangay sa mga residente sang Felisa, pangunahan nalang nila ang pag segregate sang basura agud residual waste nalang ang ihaboy sa landfill.
Samtang, nakapasa naman sang position paper ang siudad sa EMB-NIR matapos nga ginpapanaugan ini sang duha ka notice of violation may angut sa ginapatihan exceedance nga nakita sa creek malapitan sa landfill kag bangud sap ag-operate sang cell number 4 kag 5 bisan wala pa ini sang ECC.
[sibwp_form id=1]