90 tanan ka mga volcanic earthquakes ang na record sa bulkan Kanlaon humalin las 3 sang kahapon sang hapong tubtob las 12 sang udto subong nga adlaw base sa report sang Philippine Institute of Volcanology and Seismology.
Kalabanan sa mga pagtay-og ang yara lang sa 20 kilometers sa idalom sang bulkan.
Ang volcanic sulfur dioxide ukon SO2 gas nga gina buga gikan sa baba sang bulkan ang nagsaka man sa 5,083 toneladas sang kahapon.
Ini ang ika duha sa pinakamataas nga SO2 emission sang bulkan.
Padayon man ang paghabok sang sulod sang bulkan nga indikasyon sang pressure sa idalom sini.
Dugang pa sang PHIVOLCS, ang ini nga mga parameters ang naga pakita nga ang magma sa idalom sang bulkan ang naga tuga sang pagdamo sang pagtay-og sa sulod sang bulkan, ang pagdamo sang gas emission sang bulkan kag ang paghabok sini sa sulod.
Ginapaandaman ang publiko nga naga pabilin sa gihapon ang Alert Level 2 sa Kanlaon. Nagakasayuran nga may chansa nga magbuga ini sang magma.
Gani dapat estrikto nga ginapatuman nga wala sang tawo sa sulod sang 4 kilometer permanent danger zone.
Enkaso nga magbuga sang abo ang bulkan ginapahibalo ang publiko nga dapat mag mask ukon tabunan ang baba kag ilong sang ginbasa nga tela.
Ginapa halong man ang mga naga puyo malapit sa bulkan kag sa suba nga mag ulualigmat batuk sa lahat ukon muddy streamflow.
Padayon ang hugot nga monitoring sang PHIVOLCS sa Kanlaon.