Siudad sang Kabankalan ang padayon nga naga hulat sang resulta sang ila nga gina padala sa Bureau of Animal Industry para mapat-od kun ano nga masakit ang ginkamatay sang mga baboy sa lugar.
Suno kay Mayor Benjie Miranda, tubtob nga may resulta sila gikan sa BAI indi man nila mapat-od kun ano ang gin tunaan sang pig deaths.
Sa post sang isa ka hog raiser nga taga Barangay Linao sa Kabankalan, iya ginsiling nga ila ginpaidalom sa culling ang iya nga mga baboy.
Ini kasunod man sang pagmasakit sini. Suno sa alkalde, may pig deaths nga na record sa Brgy Binicuil, Daan Banua kag Hilamonan kag damlag pa gin-cordone na ang amo nga mga barangay.
Sa datus sang Provincial Veterinary Office sang June 18, 340 ang gin-report accumulated nga nagkalamatay nga baboy sa siudad.
Sa bilog naman nga probinsya , 13,418 ka mga baboy ang napatay ukon naga balor sang 150.9 million pesos.
Suno kay Governor Eugenio Jose Lacson, wala pa man nila sa gihapon nabaton ang resulta gikan sa BAI angut sa ginforward man nila nga mga specimen nga damlag pa nangin positibo sa ASF sandig sa ginpatigayon nga test sang probinsya.