Bagsakan Project ginaplano itukod sang Bacolod LGU upod sa Philippine Reclamation Authority sa reclamation area.
Sa ginapanag-iyahan nga propiedad sang siudad kag PRA sa Bredco Area ginatuyo matukod ang Bagsakan Center Project nga sarang makabulig sa mga mangunguma kag mananagat pati na mga market vendors sa siudad.
Ginpahayag ni Councilor Thaddy Sayson, pamuno sang Committee on Agriculture sang konseho, plano sang siudad nga itukod ang proyekto paagi sa joint venture agreement upod sa PRA. Wala sang nakita si Sayson nga konplikto sa pagtukod sang proyekto bisan pa may mga bagsakan center na nga naga-operate sa siudad. Nagapati siya nga sarang mapahagan-hagan ang pag-gutok sang lakat sang trapiko kun masuguran na ang pag-operate sang proyekto. Ginplano sang siudad nga malapit lang sa bagsakan i-construct ang madasun nga Yuhum Housing Village.