Blue ang color sang alliance of independent candidates nga ginpangunahan ni Councilor Wilson Gamboa,Jr. nga nagfile sang iya certificate of candidacy para sa pagka vice mayor sa Bacolod.
Kaupod niya nga nagfile man sang COC ang mga negosyante nga magapapili man nga independent sa pagka konsehal sang siudad nga sanday Lorenzo Ruben Contreras, Christian Weber, Jiffy Jaoud kag Rico Villafuerte.
Mangin kaupod man nila sa alyansa si Atty. Eduardo Padios, ang anay seaman nga si Allan Arroyo kag si Atty. Cesar Beloria nga anay pamuno sang City Legal Enforcement team sang siudad.
Ginsiling sang mga kandidato nga sila ang alternatibo nga mga kandidato nga sarang makadala sang pag-bag-o sa panghimanwa sa tuyo nga malampuwasan man sang pumuluyo ang epekto sang pandemic.
Sila man ang una nga mga kandidato nga amo lang ang naka pirma sa integrity pledge sang Comelec para sa natalana nga 2022 national kag local elections.
Si Gamboa ang magapapili sa pagka bise-alkalde batuk sanday incumbent Bacolod City Vice-Mayor El Cid Familiaran sang Grupo Progreso kag anay konsehal Atty. Caesar Distrito sang Asenso Bacolod.
Ginakabig bilang naga isahanon nga katapo sang opposition si Gamboa sa konseho sang siudad. Pero upod sa mga independent candidates nagapati sila nga sa tion sang pinili-ay indi sila maga-isahanon bangud mangin kaupod nila ang pumuluyo nga magadepende man sa pag-bag-o nga ila pagadal-on kun sila mangin madinalag-on.