Ginakwestyon sag Bacolod LGU ang resulta sang water testing sang Environment Management Bureau Negros Island Region sa Sanitary Landfill sang siudad sa Barangay Felisa matapos nga may water contamination nga nakita sa malapit nga creek.
Ini bangud ginserbehan sang EMB sang Notice of Violation ang siudad sa amo nga rason. Hulyo 9 kag 20, ginpatigayon sang EMB ang testing.
Ginsiling naman ni Bacolod City Administrator Atty. Mark Steven Mayo, nga sang Agosto, nagpatuman man ang siudad nga kaugalingon nga testing, apang wala ini nagsanto sa resulta sang EMB-NIR.
Suno sa iya, ang ginapatihan nga "exceedance" sa tubig nga naguwa sa resulta sang EMB, ang wala nakit-an sa resulta sang water testing sang siudad.
Agud matumod ang kamatuoran, nagpanawagan si Mayo sa EMB nga magpatigayon liwat sang joint inspection kag water re-testing sa landfill agud ma verify ang resulta.
Naghatag na sang position paper ang siudad sa EMB-NIR matapos sa duha ka notice of violation nga ginpapanaog sa ila.
Sa karun, ginapasabat man sang siudad ang daan nga garbage collector nga IPM Construction and Development may angut sa wala mahikot nga Environmental Compliance Certificate ukon ECC sang cell number 4 nga ila gin-construct.
Naga-awas na ang cell number 4,rason nga ginagamit na sang siudad ang cell number 5 nga wala man sang ECC.
Pagklaro ni Mayo, indi pa makuhaan sang ECC sang cell number 5 bangud wala pa man sang ECC ang cell number 4.
Gintinguhaan man sang Digicast Negros nga makuhaan sang bahin ang EMB-NIR may angut sa gina-alegar wala magsanto nga resulta sang water testing, apang wala pa ini makasabat.
[sibwp_form id=1]