Johnson and Johnson ang magasugod na sang ila clinical trials para sa COVID-19 vaccine sa Bacolod City sa madason nga bulan.
Nagsapul na kaina sang aga sa Bacolod Emergency Operations Center ang principal administrator sang Johnson and Johnson para ipahabilo sa EOC nga nagapadayon karon ang ila recruitment para sa mga volunteers para sa ila Phase 3 trials sang bakuna kontra COVID-19.
Suno kay Bacolod EOC Executive Director Em Ang, nagahinyo ang kumbuyahan sang bulig sang EOC kag sang mga barangay para sa amo nga recruitment.
Magasugod na sila sang clinical trials sa madason nga bulan kag ang Bacolod ang isa sa lima ka mga siudad sa pungsod nga ila ginpili para himuon ang trial.
Ini ang isa ka randomized, placebo-controlled clinical trial nga nagatuyo mag evaluate sang safety kag efficacy sang bakuna sa kinyentos ka mga pumuluyo nga naga edad 40 anyos pasaka, pati na ang mga may mga comorbities ukon may ginabatyag nga balatian.
Gindugang pa ni Ang nga bangud nangin pilot testing area ang Bacolod hatagan man ini sang prayoridad sang Johnson and Johnson sa tion nga mangin available na ang ila COVID-19 vaccine.