3 ka mga anggulo ginalantaw sang kapulisan sa pagpatay sa community broadcaster sa La Castellana.
Padayon nga nagapangita sang CCTV videos kag mga saksi ang kapulisan agud makilal-an ang nagpatay sa community broadcaster sa Sitio Kawayanan, Barangay Robles sa banwa sang La Castellana sadtong Biyernes.
Nagatindog sa gwa sang ila balay, sa higad sang dalan ang biktima nga si Julito Calo sang nagpondo ang isa ka SUV kag gintiro siya. Nagpadulong ang SUV sa proper sang La Castellana.
Magluwas nga naga-host si Calo sa programa nga “Waswasanay sa Quinto Distrito” sa DNN News FM sa Himamaylan, siya ang isa man ka job order worker sang Himamaylan City LGU. Ang iya live-in partner ang taga La Castellana, rason nga didto siya nagapauli.
Sandig sa records sang PNP, naka-agi dakop sa drug buy-bust sadtong 2018 si Calo apang siya ang nakagwa matapos maka-avail sang plea bargaining agreement.
Drugs, work-related kag personal ang pila lang sa mga anggulo nga ginalantaw sang kapulisan sa kamatayon sang biktima.
Subong nga adlaw, nagpadulong ang Presidential Task Force on Media Security sa Police Regional Office-Negros Island Region agud usisaon kung lehitimo nga media practitioner ang biktima.
Ginmanduan na sang PRO-NIR ang Negros Occidental Police Provincial Office nga magtukod sang Special Investigation Task Group agud i-track ang gunman nga naka-SUV.*
[sibwp_form id=1]