Isa ka Job Order worker sa San Carlos City ang nag nagpositibo sa pag gamit sang illegal drugs sa surprise drug test nga ginpatigayon.
Ini suno kay Mayor Renato Gustilo nga nag pamalibad na mag pahayag kun sa diin nga departamento na assign ang natungdan nga JO.
Nagapadayon ang surprise drug test sa mga empleyado.
Suno kay Gustilo, iga assess sang duktor sang City Health Office ang estado sang nagpositibo kag magadepende ang tanan sa ipa gwa sini nga recommendation.
Paathag sang alkalde kun iga recommend ang pagpaidalom sa rehabilitation kag maga sugot ang natungdan may tiyansa ini nga maka balik sa trabaho.
Kun regular ang empleyado nga nag positibo, sandig sa Civil Service Commission nga pagsulundan, ipaidalom sa confirmatory test ang iya nga resulta kag ipaidalom man siya sa rehabilitation kag disciplinary action depende sa resulta sang iya Drug Dependency Examination.
Sang Lunes nag patigayon sang surprise drug testing ang San Carlos City sa mga empleyado sang City Engineering Department. Ang resulta sang amo nga department ang padayon pa nga gina hulat.
“Kun indi siya magsunod, we’ll outrightly relieve him, bale wala na siya sa gobyerno. May assessment, kun indi siya mag pa rehab automatically dropped sya. The same sa regular. Ang regular lain lang because you’re given the opportunity to take rehabilitation, if you refuse then you will be dropped, file charges against you or you voluntarily resign”, suno kay Gustilo.