Mga modernized jeepney operators nga ginpasakaan sang kaso nga 38 counts of carnapping naghinyo sang bulig sa siudad.
Nagahilapit na ang Disyembre 31 nga deadline para sa expiration sang gin-issue nga provisional authority para sa pagbyahe sang mga traditional jeepney operators. Gani pila sa katapo sang grupo sang traditional jeepney operators ang naghinyo sang bulig sang konseho sang siudad angut sa ila sitwasyon.
Upod man sa nagpabutyag sang sentimiento sa session sang konseho ang operator sang modernized jeepney nga si Philip Burata matapos isa siya sa apat nga ginpasakaan sang kaso nga 38 counts of carnapping sang Choret Corporation. Naghinyo si Burata sa konseho nga kuntani ma-usisa ang mga pagsulundan sa pag consolidate sang ila prangkisa para sa pagtukod sang corporation para sa modernization program.
Ang management sang Choret Corporation ang nag-akusar sa ila bangud sang kapaslawan nga magbayad sa pag-operate sang modernized jeepney. Pero ginsiling ni Burata nga halin sang October 2022 asta September 2023, nagalab-ot na sa P8M ang ila nabayad sa korporasyon. Magapatawag naman sang public hearing ang komitiba sang konseho agud nga matun-an ang panawagan sang transport group.