Ang mangin pangayaw man ukon tumandok indi balasehan sang maayo nga pagserbisyo sa pumuluyo. Ini ang ginpahayag ni Javi Benitez, anak ni anay congressman Albee Benitez, sa iya pag-anunsyo sang kandidatura para sa 2022 mayoralty elections sa siudad sang Victorias.
Sa isa ka press conference nga ginpatigayon sa sulod sang malapad nga punong nga ginapanag-iyahan sang iya nagtaliwan nga lola nga si anay Victorias City Mayor Remedios Bantug, gindumdom ni Benitez ang mga panahon kag ang mga gintudlo sa iya sang iya lola tubtob sa iya pag-upod sa mga pagpangampanya kag pagserbisyo naman sang iya amay nga kongresista.
Sa edad nga 26 anyos, nagapati si Benitez nga ini na ang iya tion nga padayunon ang mga ginsugdan sang iya pamilya pinaagi sa pagpalab-ot sang maayo nga panghimanwa sa mga Victoriahanon.
“Waay sa edad o sa tuig sang experiensya ang pagserbisyo kay ang tuod-tuod nga pagserbisyo ginapensar,ginabatyag kag ginapatuman para sa mga tawo,” suno kay Benitez.
Ginsabat man sang actor ang mga isyu natuhoy sa political dynasty pati na ang pag-nominate sa iya sang partido.
Si Benitez ang ginapaabot maga-engkwentro kay incumbent Vice Mayor Jerry Jover nga amo kuntani ang masunod nga mangin kandidato sang partido para sa mayoralty elections kun basehan ang equity of the incumbent.
Sa Oktubre otso ang last day sang filing sang Certificate Of Candidacy sa Comelec, kadungan sang pagsaulog man sang kaadlawan ni Benitez.
Gani kaina may temprano pa nga birthday wish para sa iya ang iya iloy nga si Dominique kag ang nobya nga si Sue Ramirez.
Magluwas sa transparency sa bahin sang panghimanwa, luyag man tagaan prayoridad ni Benitez ang pagpasanyug sang health care service kag paghatag solusyon sa malawig na nga problema sa baha sa siudad.