Naka labay ka na bala sa tabok sang St. Scholastica’s Academy sa Eroreco? Nakita mo na bala ang isa ka lalaki nga may gina tanyag nga daw bilog nga bagay sa mga naga nilabay?
Siya si Shmuel Haimovitch, isa ka Israeli national nga naga tanyag sang iya pita bread sa higad sang dalan.
Isa siya ka mechanical engineer nga naga trabaho sa China kag nag bakasyon sa Bacolod sang bulan sang Enero.
Bangud sang pandemic wala na siya maka balik sa iya nga trabaho kag indi man siya maka pauli sa Israel.
Humalin las onse sang aga tubtob la una sang udto gina sulay niya ang init sa pag tanyag sang iya nga produkto.
Kada hapon balik naman siya liwat sumugod las kwatro sang hapon.
Suno sa iya, kinahanglan niya nga mag himakas para may income.
Naga pa free tasting pa siya sa mga naga nilabay. Suno sa iya misis nga si Annalyn, bangud sang pandemic natun-an nila ang pag negosyo kag nalipay sila nga may mga naka apresyar man sang ila nga produkto.
Magluwas sa pag bulante kag pag deliver sang pita bread, may yara sila sang gamay nga kalan-an sa ila nga garahe sa Eroreco malapit sa chapel nga naga tanyag sang Mediterranean nga pagkaon. Suno kay Annalyn, bisan maka balik na sa trabaho ang iya mister nalipay siya kay naka sugod siya sa pag negosyo.
Magluwas nga dako ang nabulig sa ila sa ila nga pag baligya sang pagkaon may nabuligan pa sila. Ang naga pang deliver sang pagkaon kag naga bulig kay Shmuel nga si Rene ang tumandok sang Hinobaan nga nawad-an man sang ubra sang pandemic kag ila natagaan sang panibag-o nga ubra.
Suno kay Shmuel bisan maka balik na siya sa iya trabaho sa china ukon maka pauli man sa Israel padayon siya nga maga balik balik sa Bacolod City kay iya na nga ginpalangga ang mga Bacolodnon bangud sang ila ginpakita man nga pagpalangga sa iya gina tanyag nga pagkaon.