Sini gid lang nga Martes, nakilala ang bangkay nga nasapwan sa Hacienda San Isidro, Barangay Concepcion. Siya si Mars Relles, alyas Dodoy, 47-anyos, residente sang Barangay Estefania, sa Bacolod.
Suno kay Major Rhazl Jim Jocson, deputy chief sang Talisay PNP, nangin biktima sang stabbing incident si alyas Dodoy sadtong Marso 2025 sa Barangay Estefania.
Naka-agi siya preso sa Bacolod City Jail sang napulo ka tuig bangud sang kaso nga pagpatay kag gun charges.
Ginahulat pa sang Talisay PNP sang resulta gikan sa SOCO kun ano ang ginkamatay sang biktima.
Samtang, nagapabilin pa nga unidentified ang duha ka mga bangkay.
Isa diri ang nakit-an sa kilid sang kampo sa Hacienda San Isidro, Barangay Concepcion, Martes sang kaagahon.
Suno kay Jocson, may mga tattoo ang bangkay sa dughan kag likod.
Ginabulubanta 45 tubtob 50 anyos ang edad, nakasuksok sang blue nga t-shirt, maong nga shorts, kag green nga tsinelas.
Narekober man sa lugar ang isa ka itom nga helmet kag abandonado nga Euro Viper Man 150 nga motorsiklo kag may temporary plate number ini nga 061609.
May kabudlayan ang kapulisan sa pagkilala sang nagakaagnas nga bangkay nga nakit-an sa Hacienda Minuluan Mendoza, Barangay Matab-ang.
May blue nga shorts ang bangkay, nga yara na sa advanced state of decomposition.
Suno kay Jocson, posible mga isa na ka bulan ang bangkay, bangud halos kitaon na ang tanan nga tul-an sini.