Patay ang isa ka electrician nga naga angkas sa motorsiklo sang mabungguan sang isa pa gid ka motor sa Crossing Busay, Barangay Punta Mesa, Manapla, Lunes sang hapon.
Ginkilala ang biktima nga si Pio Layos, Jr., 59-anyos. Siya ang naga angkas sa kay Glen Bagolcol. Halin sila sa Manapla kag padulong sa Victorias City.
Nagasunod sa ila ang isa pa gid ka motor nga ginamaneho naman ni Jessmar Napao sang, Cadiz City.
Halin man ini sa Cadiz City kag padulong sa Victorias City. Samtang nagasundanay, hinali nga nagliko si Bagolcol, rason nga nabungguan ini ni Napao nga nagresulta sa paglabog ni Layos.
Pareho nga nakaangkon sang mga pilas sa lawas si Layos kag Bagolcol kag gindala ang mga ini sa Dr. Ramon Gustilo Hospital. Gindeklarar nga dead on arrival si Layos.
Si Bagolcol ang detained karon sa Manapla PNP.