Patay ang isa ka babaye, samtang pilason naman ang anum ka iban pa sa pagbungguanay sang tatlo ka mga salakyan nga nalakipan sang hauler truck, tricycle kag motorsiklo sa national highway sang Purok Tuburan, Barangay Tampalon sa syudad sang Kabankalan, Sabado nga adlaw.
Nadala pa sa ospital si Jinky Pitogo, 51-anyos, apang ini ang nagtaliwan.
Lakip sa mga pilason amo ang driver sang tricycle, 11-anyos nga pasahero sini, driver sang motorsiklo, driver sang hauler truck kag ang duha niya ka mga helper.
Base sa imbestigasyon, nadulaan sang preno sa kurbada nga bahin sang dalan ang hauler truck nga padulong city proper kag ginamaneho sang 18-anyos nga si Eljohn Sarmoy, rason nga natumba ini kag natumbahan ang tricycle nga nagalabay sa pihak nga lane nga ginamaneho naman ni Armando Canoy Sr.
Ang nagasunod nga motorsiklo nga ginamaneho ni Jestoni Porras, 31-anyos ang naglikaw apang ini ang nagdiretso sa hilamonan sa higad sang dalan.