Ginkumpirmar ni Atty. Vanessa Encabo, spokesperson sang Bacolod City Legal Office nga may isa pa gid ka regular employee sang City Treasurer’s Office ang gindagdagan sang show cause order bangud sa pagpanukot sang amusement tax nga wala sang resibo.
Damlag pa may regular employee nga una na nga ginreklamo bangud sang amusement tax collection man nga wala sang resibo.
Natukiban sang CLO nga parehas lamang nga mga ilimnan ang nag reklamo sa duha ka empleyado sang CTO kag parehas man nga insidente ang ginatumod nila.
Magluwas sa duha ka ilimnan sa Bacolod nga una na nagpasaka sang reklamo sa mga empleyado sang CTO, may isa pa gid ka ilimnan ang nagreklamo sa mga natungdan kag padayun pa ini nga gina-usisa sang CLO.
Ginatan-aw pa sa karun sang CLO ang record sang City Treasurer’s Office agud matumod kun gina-remit gid man sang mga natungdan ang ila mga ginakolekta ukon wala.
Natabo ang insidente sang Disyembre sang tinalikdan nga tuig.
Isa pagid sa mga reklamo sang mga bar owners amo ang pagsukot sang empleyado sang amusement tax sa ila bisan wala man sila aktibidad nga ginhiwat sa amo nga tion.
Obligado lamang ang mga ilimnan nga magbayad sang amusement tax fee kun may ticketed nga aktibidad sila nga ginhiwat.
Samtang, ang empleyado naman sang City Legal Office nga ginreklamo bangud sa pagpamalibad nga pagbayad sa iya mga gin-order sa isa ka ilimnan sa Goldenfields, ang nakasabat na sa iya show cause order.
[sibwp_form id=1]