Isa ka lalaki nga Fiscal Examiner Officer sang Bacolod City Treasurer's Office ang ginpaidalum ni Mayor Greg Gasataya sa 60-day preventive suspension without pay bangud sa pagpangkolekta sang amusement tax nga wala gin remit.
Ginsiling ni City Legal Officer Karol Joseph Chiu, nga sumugod sang nagligad nga semana, wala na gin pa report sa opisina ang natungdan nga regular employee.
Tatlo ka mga bars sa siudad ang nagpasaka sang reklamo batuk sa iya. Gina-alegar nga personal nga ginasukot sang empleyado ang mga bar owners sang amusement tax kag wala man ini nagahatag sang resibo.
Suno kay Chiu, nagdepensa pa ang natungdan nga iya ginremit sa Treasurer's Office ang kwarta, apang natukiban nga halos katunga lamang sang 8,000 pesos nga iya nakolekta ang na remit.
May resibo man siya nga dala suno sa iya, apang nalipatan lang niya ini nga ihatag.
Dugang ni Chiu, wala man sang otoridad ang natungdan nga personnel nga manukot sang amusement tax, bangud ang owners dapat ang nagabayad sini sa opisina sang CTO.
Serious Dishonesty, Grave Misconduct, Gross Neglect in the Performance of Duty, kag Conduct PreJudicial to the Best Interest of the Service, ang apat ka kaso administratibo nga ginapangatubang sa karun sang amo nga empleyado.
May isa pagid ka empleyado sang Treasurer's Office ang ginatudlo nga may kahilabtanan man sa iya, apang wala pa ini mapamatud-an.
Gintinguhaan sang Digicast Negros nga makuhaan sang bahin ang natungdan nga empleyado apang wala pa ini nagsabat.
[sibwp_form id=1]