May isa ka banwa sa Negros Occidental nga sa karon padayon pa nga gina assess kun bala malakip ini sa areas of concern sa maabot nga piniliay.
Sa Provincial Joint Security Control Center nga pagsapol kaina, para sa PNP naga pabilin sa green category ang mga banwa kag siudad sa Negros Occidental.
Nagakasayuran nga wala sang security concerns ukon generally peaceful ang mga lugar.
Pero suno kay Atty Lionel Marco Castillano ang Regional Director sang COMELEC may isa ka banwa nga gin-identify ang militar nga mahimo mangin area of concern bangud sang insurgency.
Dugang pa ni Castillano may local issue ang lugar nga ginsakyan man sang rebeldeng grupo.
Talakayon pa ini liwat sang militar kag PNP.
Paathag ni Castillano mahimo nga may pagbag-o sa mga assessment sa lugar.
Kaangay na lamang sa natabo sa La Libertad sa Negros Oriental nga sa una nga assessment sang PJSCC yara sa yellow category, ugaling kay may ginsunog nga equipment sini lamang ang rebeldeng NPA gani mahimo nga may pag kambyo sa category sini.