Ipm-cdc ginmanduan sang siudad nga doblehon ang pagpanghakot sang basura karon nga holiday season. Samtang ginahinyo man sang pamunuan sang Department of Public Services ang publiko nga i-dokumento ang mga reklamo batuk sa mga palero nga naga-pang solicit karon nga paskwa.
Nagalab-ot sa 1,800 cubic meter kada-adlaw ang nagalab-ot sa sanitary landfill sang siudad. Pero suno kay Mariafe Tresfuentes, officer in-charge sang Department of Public Services, sarang pa magdoble ang kadamuon sang basura tubtob sa una nga semana ang bag-ong tuig.
Gani ginmanduan niya na ang tagdumalahan sang IPM-CDC nga amo ang taga-hakot sang basura sang siudad nga doblehon kag magtalana sang dugang nga garbage truck agud mapaiway ang backlog. Masami sa mga merkado, department stores kag mga baligyaan nga ginadugok sang tawo naga-doble ang kadamuon sang basura.
Bangud sini nagtalana man sang striker team ang DPS para mahakot ang mga basura sa mga kabarangayan nga indi gilayon makadtuan sang IPM. Ang pamunuan sang DPS ang naga-hinyo man karon sa publiko nga kun mahimu i-document kag i-reklamo sang pormal ang mga alegasyon batuk sa pagpang-solicit sang mga palero karon nga bulan sang paskwa. Nagpasalig ang tagdumalahan sang IPM sa DPS nga handa sila nga aksyonan ang ini nga sahi sang reklamo batuk sa ila mga empleyado.