Gina formulate na sa karon ang investigation report para sa anay pamuno sang Mambukal Resort and Wildlife Sanctuary kag sa lima sini nga mga disbursing officers may angut sa unliquidated funds.
Ini suno kay Provincial Legal Officer, Alberto Nellas, Jr., nga nagsiling nga sanday Cheryl Decena nga pamuno sadto sang Mambukal kag karon Provincial Tourism Officer kag lima ka mga disbursing officers sini ang naka submit na sang ila nga sabat sa show cause order nga ginpapanaog sa ila.
20 diyas humalin sang pagbaton sang sabat ginapaabot ang investigation report, ugaling kay tungod sa sahi sang investigation wala pa nahuman ang report.
Sa show cause order, nakasaad nga base sa Summary of Replenishment of Disbursing Officers for Mambukal Catering para sa December 31, 2023, may cash advance nga wala na liquidate kasubong man may reimbursement nga wala maka submit sang audit requirements ukon may mga deficiency.
Nakasaad nga ang income gikan sa catering services sang Mambukal ang yara sa 30.3 million pesos para sa 2023 ugaling dapat talupangdan man nga ang total expense sa amo nga period yara sa 33.9 million pesos, ukon mas daku sang 3 million pesos sang sa income nga gin-report.
Suno kay Nellas ang Mambukal yara sa idalom sang Enterprise Economic Development Department gani ini isa ka earning entity.
Gina pangayuan si Decena sa iya nga bahin bilang pamundo sadto sang Mambukal sang paathag kun ngaa natabo ini nga nag resulta sa unjustified nga pag gamit sang Mambukal Funds.
Sa bahin ni Decena iya na ginsiling nga ila na nga gina tugyan sa kay Governor Lacson ang magdesisyon base sa na-submit nga mga dokumento sang mga natungdan.