Inventory sang mga na-turn-over nga automated counting machines kag iban pa nga election paraphernalia ang ginsuguran na sang COMELEC-Bacolod.
Gin-amatan-amatan na sang katapo sang COMELEC-Bacolod ang pag-account sang tanan nga mga automated counting machines nga gin-turn over sa City Treasurer’s Office sa Bacolod City Government Center. Ini agud nga makuha sang logistics company kag mapadala balik sa COMELEC main office sa Manila. Magluwas sa mga ACM, gina-inventory pati ang mga election paraphernalia. Ginsiling ni City Election Officer Atty. Revo Sorbito, siya na ang maga-submit sang mga USB nga naga-unod sang mga data sa Comelec main office sa Biyernes. May 398 tanan ka mga ACM nga gin-gamit sa 48 ka mga polling centers sa Bacolod. Gindugang ni Sorbito nga wala sang na-encounter nga mga problema sa automated elections nga iya ginakabig nangin madinalag-on. Samtang, ginapaabot nga sa madasun nga semana masuguran sang COMELEC-Bacolod ang payout sa katapo sang electoral board nga nagserbe sa pinili-ay. May masobra sa 1,200 ka mga manunudlo nga nagserbe katapo sang electoral board sa National kag Local Elections sa siudad.