Lokal nga panguluhan sang siudad sang Silay nagpaathag nga may yara na sang program of work para sa ibulos sa naguba nga taytay sa Barangay Hawaiian kun sa diin naga zipline lang anay ang mga pumuluyo
Suno sa city administrator sang Silay nga si Atty. Edward Davilla, gilayon nga ginpa himuan sang plano para maislan ang maguba mga taytay sa may Sitio Pulo Malisbog 1 sa Barangay Hawaiian sang maguba ini sang tubig baha sadtong enero 8. Pero kinahanglan magsunod sa proseso sang gobyerno kag indi man ini madali dali lang patukod gilayon.
Dugang pa niya, indi na kun tani luyag sang LGU nga paistaran pa ang amo nga lugar kay delikado katama basta tig-ululan. Ginpa applyan na sa mga residente sa housing sang siudad para mapangitaan sila sang salayluhan ugaling sa may kapin isa ka gatus ka mga pamilya nga naga puyo didto, 25 lang ang nagpabutyag nga masaylo.
Ang zipline ang ginpatukod bilang temporaryo lang anay nga talabukan sang mga pumuluyo kag indi para sa mga mabug-at mga mga bagay kasubong sang lungon nga may unod nga patay.
Nangin trending nga isyu ang pagkarga sang lungon sa zipline para mapatbok sa ila nga sitio kay nabasulan ang lgu nga gina pabay-an lang ang mga residente didto pero suno kay Davilla wala man sila ginpabay-an kag may gina sunod lang mga proseso sang gobyerno.
“Kun magbaha gani saka gid na da ang tubig tabunan gid na da sila. Supposed to be gina discourage na na da ang mga tawo nga mag ililistar kay teh ano gid na da ya nga area high risk. Amo na nga gina offeran na na da sila sang city actually 25 na na da ang nag signify nga masaylo sila sa housing facility sang siudad ang iban ya tig-a gid kay gusto nila dira gid sila ya matenir,” suno kay Davilla.