Interim service permit ginalauman sang katapo sang transport group sa Bacolod sa baylo sang extension sa provisional authority para makabyahe ang traditional jeep.
33 pa lang sa kapin 2,400 ka mga katapo sang transport group ang na-issuehan sang interim service permit sang Land Transportation Franchising and Regulatory Board. Ini samtang nagahilapit ang March 31 nga deadline kag expiration sang extended provisional authority nga ginhatag sa mga traditional jeepney operators sa siudad.
Suno kay Deigo Malacad, secretary general sang United Negros Drivers and Operators Center, indi na pwede ma extend pa ang PA amo nga ginalauman nila nga mapadasig ang issuance sang special permits agud man makapadayon sila sa pagbyahe kadungan sa ginapatuman nga jeepney modernization program sang Department of Transportation.
“Base sa Republic act 4136, six months lang ang PA indi na pwede ma extend pa gid”, suno kay Malacad.
Suno kay LTFRB Western Visayas Spokesperson Atty. Salvador Altura, Jr., indi pa mapat-ud kun pwede pa ma extend ang PA nga ginhatag sa mga traditional jeepney amo nga special permits ang gina-issue nga nakabase sa natukod nga Local Public Transport Route Plan sang siudad.
Ang siudad amo man ang naga-identify sang rota para sa modernized jeepney kag traditional jeep.Ginapaabot man sang traditional jeepney operators nga sa gihapon ma retain sila sa ila mga rota samtang wala pa malab-ot ang 1,099 ka mga modernized jeepney units nga target makabyahe antes matapos ang bulan sang Marso.