Patay ang 37 anyos nga si Police Staff Sargeant Ildefonso Casugod matapos tiruhon kaina sang wala pa makilala nga persona sa Reclamation Area sa banwa sang Pontevedra.
Sa imbestigasyon sang PNP, si Casugod ang naga jogging mga alas 6 sang aga sa nasambit nga lugar sang hinali siya palapitan kag tiruhon sa ulo sang suspek nga nag resulta sa iya kamatayon.
Suno sa OIC sang Pontevedra PNP nga si Captain Hancel Lumandaz, upod pa nga naga jogging sang biktima ang alkalde sang banwa sang matabo ang pagpaniro.
Madamo man sang iban pa nga nga naga jogging sang matabo ang krimen ugaling suno sa pulis wala sang may makakilala sa suspek bangud natabunan sang hood sang jacket ang iya ulo kag siya ang naka face mask.
Gilayon nagsakay ang gunman sa motorsiklo kag nagpalagyo.
Suno kay Lumandaz, posible may kaangtanan sa iya trabaho bilang pulis ang motibo sa pagpatay kay Casugod bangud na assign ini sa intelligence section nga amo ang naga tutok sa mga kaso angut sa illegal drugs kag illegal gambling.
Padayon sa karon ang hot pursuit operation sang PNP.