
NBI intel officer nga gin-alegar namahog sa mga staff sang restobar gin disarmahan kag natalana man usisaon sang Internal Affairs Division sang NBI.
Gindisarmahan na ni NBI-Bacolod Chief Atty. Renoir Baldovino ang intelligence officer nga si Janna Navales kabahin sang disciplinary action kag natalana nga pagpangusisa para sa ipasaka nga administrative case.
Ini matapos ginreklamo ang intel officer nga namahog gamit ang iya pusil sa staff sang restobar sa 18th Street-Lacson sa Bacolod.
Suno kay Baldovino maga-usisa ang NBI Internal Affairs Division bisan pa nangayo na sang pasaylo ang intel officer sa mga trabahador sang restobar.
Wala nagasabat sa iya nga contact numbers si Navales kag wala man siya sa opisina sang NBI-Bacolod sang gintinguhaan sang Digicast Negros nga makuha ang iya bahin.
Sa istorya sang manager sang kombuyahan, tuman ang ila pagkahangawa sang nagbalik sa bar ang nagpakilala abogada nga intel officer sang NBI kag nagpa gwa sang pusil sa tuyo nga mabalik ang iya nga jacket nga may unod nga cellphone.
Nakuhaan sang CCTV video ang pagbitbit sang pusil sang intel officer samtang gina usisa ang isa sa mga waiter.
Sa separado nga video nakit-an man ang nakasablay nga jacket sa abaga sang intel officer antes siya nagbiya sa bar.
Nag gwa nga nabilin niya sa opisina sang NBI ang iya nga jacket kag indi sa ginkadtuan nga ilimnan.