Isa sa luyag talakayon sang Commission on Elections sa militar kag kapulisan may kaangtanan sa gina paabot nga Barangay kag SK Elections amo ang insurgency problems sa pila ka mga barangay sa sur nga bahin sang Negros Occidental.
Suno kay Provincial Elections Supervisor, Ian Lee Ananoria, without prejudice sa militar, luyag niya nga matalakay kun bala ang mga apektado nga barangay ma deklara nga areas of concern.
May mga criteria man nga balasehan para sa amo nga deklarasyon.
Sang nagliligad lamang nga mga bulan may mga nag evacuate sa pila ka mga barangay labi na sa Himamaylan bangud sang sunod-sunod nga engkwentro sa tunga sang rebelde kag militar.
Mismo sa filing naman sang certificates of candidacy, mapat-od kun bala may mga barangay nga makabig may yara sang intense political rivalry.
Sa Hulyo 3 tubtob 7 ang filing sang COC, mas temprano sang sa mga nagliligad nga eleksyon.
Suno kay Ananoria, sa tion nga maka file na sang ila nga COC ang mga magapapili sila ang makabig na dayon nga mga kandidato.
Samtang, sa Marso 20 gina pabot ang tiglawas gikan Comelec Manila para mag review kag mag check sang mga reports karon nga natapos na ang Election Registration Board Hearing. Ginapaabot matapos sini ang project of precincts.